Lev 21 | NdeIBE | STEP | UJehova wathi kuMosi, “Khuluma labaphristi, amadodana ka-Aroni ubatshele ukuthi umphristi kakumelanga azingcolise ngokomlayo ngokungcwaba loba ngubani wakibo ofileyo,

Leviticus 21

Imilayo yabaPhristi

1 UJehova wathi kuMosi, “Khuluma labaphristi, amadodana ka-Aroni ubatshele ukuthi umphristi kakumelanga azingcolise ngokomlayo ngokungcwaba loba ngubani wakibo ofileyo, 2 ngaphandle kwesihlobo esiseduze njengonina, uyise, indodana loba indodakazi yakhe, umfowabo 3 loba udadewabo osegumeni ngoba engelandoda, lowo angamngcwaba.

4 Makangazingcolisi ngenxa yezihlobo zomkakhe, azibhixe ngokungcwabana lazo.

5 “ ‘Abaphristi kabangaphuci amakhanda abo loba bagunde amacele ezindevu zabo loba bazicabe emzimbeni. 6 Bamele babengcwele kuNkulunkulu wabo njalo kakumelanga bangcolise ibizo lika-Nkulunkulu wabo. Kababe ngcwele ngokuba yibo abenza iminikelo kuJehova ngomlilo, ukudla kukaNkulunkulu wabo, kababe ngcwele.

7 “ ‘Kabangathathi abafazi abangcolileyo ngenxa yobufebe loba abehlukana lamadoda abo ngokuba abaphristi bangcwele kuNkulunkulu. 8 Bathatheni njengabantu abangcwele ngokuba mina Jehova olingcwelisayo ngingcwele.

9 “ ‘Aluba indodakazi yomphristi izingcolisa ngokuba yisifebe, iyangisa uyise; kayitshiswe ngomlilo.

10 “ ‘Umphristi omkhulu kubafowabo onguye othelwe amafutha okugcoba umphristi ekhanda, abekiweyo ukuthi agqoke izivunulo zobuphristi, kamelanga ayekele izinwele zakhe zibutshapha loba adabule izigqoko zakhe ngenxa yosizi. 11 Kamelanga angene lapho okulesidumbu khona. Kangazingcolisi ngaleyondlela loba kufe uyise kumbe unina,

12 njalo kangasuki endlini kaNkulunkulu kumbe ayingcolise ngokuba usekhethiwe ngokugcotshwa ngamafutha kaNkulunkulu wakhe. Mina nginguJehova.

13 “ ‘Umfazi amthathayo kabe yintombi egcweleyo. 14 Kangathathi umfelokazi, isalukazi loba umfazi ongcoliswe yibufebe, kodwa athathe kuphela intombi egcweleyo ebantwini bakibo, 15 angangcolisi inzalo yakhe phakathi kwabantu bakibo. Mina nginguJehova engimenza abengcwele.’ ”

16 UJehova wathi kuMosi, 17 “Tshela u-Aroni ukuthi kakho owenzalo yakhe kuzo zonke izizukulwane ezizayo uma elobulima obuthile ongasondela anikele ukudla kukaNkulunkulu wakhe. 18 Akulamuntu olobulima bani ongasondela: umuntu oyisiphofu, longumqhuge, logogekileyo loba ozitho zingaphelelanga; 19 akulamuntu olobulima enyaweni loba esandleni 20 kumbe odundubeleyo emahlombe, loba ongumuthwa, kumbe elobulima bamehlo loba olentembuzane kumbe izilonda eziphihlikayo loba olimeleyo emasendeni. 21 Akungabi khona owenzalo ka-Aroni umphristi othi nxa elobulima asondele ukunikela ukudla kukaNkulunkulu wakhe.

22 Angadla ukudla okungcwelengcwele kukaNkulunkulu wakhe loba yikudla nje okungcwele; 23 Kodwa ngenxa yobulima bakhe kamelanga asondele eduze kwekhetheni kumbe aye e-alithareni ngoba ngaleyondlela angangcolisa indlu yami engcwele. Mina nginguJehova obenzayo babe ngcwele.’ ”

24 Konke lokhu uMosi wakutshela u-Aroni lamadodana akhe labo bonke abako-Israyeli.